™¤¦¤™¨¨¨~*§*®§*Alone In EuRoPe Part (2)*§®*§*~¨¨¨™¤¦¤™
عودة مرة أخرى
قبل ما أبدأ اليوم
فيه شي نسيته المرة الماضية اللي هم أصدقائي في الرحلة
كثير من الشباب قالوا كيف رحت لحالك
وهم ما يدرون ان معي هالشلة 
وش رايكم فيني وأنا أتفلسف :p
المهم وصلنا المرة الماضية عند فندق
Star Inn hotel Salzburg Zentrum
الفندق هذا من فئة ٣ نجوم
وموقعة كان جيد بينه وبين المنطقة التاريخية ونهر السالزاك مجرد نفق
جلست في الفندق هذا ٣ ليالي الليلة ب ٦٩ يورو
وهذي صورة للغرفة
هنا صارت اول مشكلة انا وصلت الفندق حوالي الساعة ٨ الصباح ووقت الدخول كان ٣ العصر يعني جاي بدري بسبع ساعات وكنت ناسي ابلغ الفندق بوقت الوصول 
قالوا لي ما نقدر ندخلك الحين فخلت شنطتي عندهم وطلعت امشي حول الفندق وكان الجو مشمس وحار نوعا ما ويوم تكسرت رجولي من المشي رجعت للفندق وجلست في اللوبي ما بين اوراق ولاب توب الين الساعة ١٢ بعدها قالوا لي ممكن تدخل الغرفة الحين.
دخلت الغرفة واخذت دش وصليت ونمت شوي
طبعا في هالمرحلة تقدر تقول ان المود كان الجوع كافر
فعشان تخليه يسلم تروح تاكل من مطعم تضمنه وما تتعب نفسك في الدوران
فكان المطعم
بعد العشاء رحت لساحة الجامهير في سالزبورج لمشاهدة
مباراة المانيا وتركيا ضمن نصف نهائي بطولة امم اوروبا ٢٠٠٨
الصورة من الجوال عشان كذا مو واضحة مرة
نسيت الكاميرا من الجوع
اما بعد المباراة جا مطر قوي وانا ما معي مظلة وضعت جلست اكثر من ساعة لين لقيت الفندق
ونمت على طول
في اليوم الثاني
توجهت لنفس السوق رحت ادور محل اخذ منه شريحة جوال وكل ما سالت محل عطاني بطاقة شحن
الممهم اني ضيعت وقت كثير عشان هالشريحة
وبعد ما اخذت شريحة رحت للجهة الثانية من نهر السالزاك
تمشيت هناك شوي وتغدين كباب
وقررت اني ارجع للفندق وانا في الطريق
شفت كنيسة وعندها زحمة برى فاشتغلت عروق اللقافة وقلت خل ادخل اشوف وش عندهم
طلعت الكنيسة مظلمة وفاضية
جلست اشوف واحد جالس يمشي حبة حبة بين هالشموع وشايل بيده شمعة
وأنا طالع جا في وجهي الحارس حقهم ضحكت في وجهي وقال مساء الخييير بالعربي
انا طارت عيوني ورديت عليه وبعدها للفندق قيلت لي ساعة تقريبا
وبعدها توجهت للساحة لمتابعة مباراة
روسيا واسبانيا ضمن نفس البطولة
طبا المباراة كانت باردة جدا بالنسبة لي فتركتها في نص الشوط الأول
ورحت لحبيبي ماك وتعشيت وانا راجع مريت الساحة على نهاية الشوط الثاني كملته ورحت للفندق
وأنا راجع للفندق شفت اعلان على الخريطة اللي كانت معي عن شركة سياحية فسألت الموظفة كيف اروح لموقعهم عشان احجز
قالت نحجز لك من عندنا هنا عاد انا بغيت زيارتين موجودة في الاعلان ورا بعض دقت تسالهم ممكن اني اخذهم اخاف اطلع مع الاولى ونتاخر لاي سبب ويسحبون علي في الثانية قالوا عادي حنا ننسق بين المجموعتين فاخذت الزيارتين لليوم الثالث في سالزبورج ورحت انام
في اليوم الثالث قمت بدري لان سيارة الشركة السياحية بتجي تاخذني من الفندق
اعتذر اني ما اذكر لا اسم الشركة ولا سعر الجولات بس الشركة باصهم احمر دبروها انتوا
وكانت الزيارة الاولى لمنجم الملح في سالزبورج
هذا مدخل المنجم اعتذر عن دم وضع صور اخرى حاليا بسبب ان الصور
اضائتها سيئة لان الإنارة خفيفة في المنجم
طبعا بعد ما خلصنا وفي طريق الرجعة وقف الباص في وسأل المرشد من اللي بيروح لجولة ثانية رفعت يدي ومعي ثلاث عجز وشايب
قال انزلوا يالله كنا في طريق سريع برى المدينة قلت في نفسي الرجال زعل علينا وبينزلنا طلع الباص الثاني واقف في قطع الشارع ركبنا معهم وتوجهنا لكهف الثلج
المهم الكهف هذا حلو واعجبنيبس الطلعة له تهد الروح خصوصا للرشيقين ولياقتهم عالية زيي
وهذي بعض الصور للكهف والطريق له
هذا المدخل من نص الطلعة تقريبا
عند مدخل الثلج
صور متنوعة من داخل الكهف
هالقلعة يقولون انها لهتلر
بعد هالجولة رجعت للمدينة القديمة اللي جنب الفندق تمشيت فيها شوي
وفي اليوم التالي مهمة صباحية سريعة
وبعدها تشيك آوت وعلى محطة القطار وتذكرة لفيينا
طبعا انك تكون اول مرة تركب قطار في حياتك (غير قطار حديقة الحيوانات) واغلب البشر اللي في القطار يتكلمون الماني
وانت ثقافتك فرنسية فيه مخاطرة اعلى من انك تستثمر في السوق السعودي طبعا ما يحتاج اقولكم اني بغيت انزل في اول محطة وقف فيها القطار بس ربكم ستر
وصلت فيينا ومن محطة القطار الي الاندرقراوند برضو اول مرة بس اعجبكم بدون مشاكل الي اقرب محطة للفندق
اول ما وصلت المحطة اتلفت يمين يسار ماش ما قدرت اشوف الفندق قمت امشي وادربي الدمجة قدامي
ولا احد من اللي حاولت اسالهم عرف الفندق فرجعت لمحطة الاندرقراوند وسالت مكتب المعلومات (اذا منت متاكد من المكان اللي بتروح له او عندك اي اشكاليه دور حرف الآي ورح اسأالهم ولا تضيع وقتك ) طبعلي الموظف كروكي للفندق اللي اسمه
Wilhelmshof Hotel
اللي احب اقول انه وبكل بساطة الفندق هذا مقلب بكل ما تعنيه الكلمة من معنى
وللاسف انه على ما اذكر انه كان اغلى فندق سكنت فيه بسبب نهائي أمم أوروبا
اول ليلتين حسبت على ١١٩ يورو والليلة الثالثة ٨٩ يورو
وبسبب اني ساخط عليهم ما صورت اي صورة له قلت اروح يروح الفلم على فندق ما يسوى :p
طبعا فكرت اني اكنسل الحجز بس الفكرة الغيت قبل ما تكتمل بسبب النهائي واني بتعب وبيضيع وقتي على الفاضي
بعد ما ريحت شوي طلعت اتمشى على نهر الدانوب
وللاسف ما عندي صور للنهر لاني رحتله مرتين تقريبا وكلها في الليل والاضاءة ما هنا ذاك الزود
طبعا الفندق جنب مدينة ملاهي اعتقد انها الاشهر في فيينا اسمها بلاتر < < مو رئيس الفيفا :d
بس ما دخلتها لانها ما تحلى الا بشلة
وفي اليوم اللي بعده
اخذتها من قاصرها وتوجهت لمكتب شركة سياحية وانا مخطط على جولة من البرشور اللي شفته مدتها ثلاث ساعات ونص
بس وصلت متاخر وقررت اني ما ارجع كذا واخذت جولة ثانية من عندهم كانت الجولة على بعض معالم المدينة
اللي صار ان الباص وقفنا عن مبنى ملون وفيه شجرة طالعة في الدور الاخير وعنده مقهى ومحلات هدايا ونزلنا وقال ثلث ساعة وارجعوا
بعد مارجعت بعد ثلث ساعة مالقيت الباص وما فيه الا انا وعائلة كانوا معي بالباص وانطقينا حول الساعة على ما ركبنا الباص اللي بيرجعنا
انا متنكد يومها من الفندق وجو هالشركة وزادوها :@
عاد مكتب الشركة عند ساحة ستفانزبلاتز احدى اشهر ساحات فيينا
يوم جعنا الا الساحة صجة ولجة كان الجماهير الاسبانية والالمانية مسوين جو غير طبيعي
رقص واغاني واستعراضات المهم انهم بيضوها الجماهير
وهذي صورة بعد احدى الاغاني المشتركة بين الاسبان والالمان
بس الشاطر اللي يعرف وين الخطأ في الصورة
قضيت اغلب النهار في الساحة
وبعد كذا رحت لإحدى ساحات الجماهير لمشاهدة المباراة النهائية مع ان كان ودي احضر في الملعب
بس مو مشكلة البطولة الجاية ان شاء الله
اما في اليوم اللي بعده
توجهت قبل الظهر لقصر الشونبرون (قصر امبراطور النمسا سابقا)
اللي شافوا فلم ماري انطوانيت تراها كانت عايشه في هالقصر قبل تعرس
القصر حلو وكبييير وفيه حديقة حيوانات كانت خاصة للامبراطور ومتاهة شجرية
القصر اخذ مني ما بين ٥ و٦ ساعات وانا ما درته بالكامل
هذي كم صورة من القصر طبعا اغلبها
وهذولي الاثنين تلقونهم في الحديقة الثاني خصوصا خرعني حسبته صدقي
في نهاية هذا الجزء راح اعطي تقييم للمدينتين
سالزبورج ٧،٥ من ١٠
فيينا ٥ من ١٠
فيينا ما ارتحت فيها بسبب سالفة الفندق المقلب وشركة السياحة
إلى لقاء قريب إن شاء الله
