اليوم الخميس كان زواج اصغر خوالي الشباب الاشقاء لامي 
طبعا كان الجو برد وتشخيص على غير فايدة احسب فيه سحب على عروس لافضل شخصية بس طلع سحب على رز وورق عنب 
على العموم الله يوفقهم ويسعدهم ويجمع بينهم بخير ويرزقهم الذرية الصالحة
الى اللقاء تومورو ان شاء الله راح اجي هنا وانا متغير شي كبير عندي في البيت ترقبوا وماهو واللي بيعرف له هديه
اليوم عرض على القناة الرياضية السعودية الحلقة الأسبوعية من البرنامج المميز شباب وقد كان عنوانها طموح .. مجهول
وتتكلم الحلقة عن الطلاب الجامعيين ومعاناتهم مع الدكاترة في الجامعات وادارات الجامعات وتم التطرق لعدة مواضيع مثل المكافات المتأخرة والحالة السيئة للسكن الجامعي والفوقية في تعامل من يسمون انفسهم دكاترة وغيرها
واستضاف البرنامج احد اعضاء هيئة التدريس في جامعة الملك سعود واحد الطلاب في جامعة الامام
الحلقة كانت مميزة وفيها عدد من التقارير الميدانية من جامعة الملك سعود والتي كانت لا تنقصها الصراحة نهائيا لكن من يستمع؟
لكن المشكلة في البرنامج او حلقة اليوم كالعادة هو الوقت فساعة واحدة لا تكفي نهائيا لمناقشة معاناة مئات الالاف من الطلبة الجامعيين.
المطلوب هنا اقتراحاتكم لمحاور نقاشية حول الجامعات ومعاناة الطلاب فيها سواء من المغتربين او المقيميين وساحاول باذن الله ايصالها لمعدي البرنامج لتخصيص حلقات اخرى عن نفس الموضوع ان امكن ذلك او سابحث عن مكان اخر لذلك
دمت بود والى لقاء
يا جماعة فيه دكتور يدرسني وناشب لي من سنتين ومن جد النفس طابت منه وممكن اسوي له اي شي وافتك منه
المصيبة الرجال اليوم حب يحطنا امام الامر الواقع بس ما اسكت له لحقته للقسم عندهم واتناقش معه واصواتنا الظاهر سمعوها اهل الخرج
هو وش سوى عشان هذا كله انا من اكثر من اسبوعين وانا كل يوم اساله متى الاختبار الثاني يا دكتور وهو يقول المحاظرة الجاية نحدد او بعدين جا اليوم وقال اختباركم يوم الاثنين الجاي(ماهو هالاسبوع) عاد انا عندي اختبار هذا الاسبوع والاربعاء والاحد الجاي والاثنين وهو بيحط اختباره الاثنين وقت المحاظرة عشان ما يجي المسا لا بارك الله فيه طبعا ما اسكت له وتناقشنا وارتفعت اصواتنا واخر شي قالي بعدين نناقش هالموضوع وطبعا ما راح اخليه المحاظره الجاية بانط في عينه واذا ما تعاون رحت لرئيس قسمهم ولو توصل لعمادة الجامعة هي خاربة خاربة المشكلة اني مجبور ادرس مواد في قسمهم الداج والفاشل بحكم تخصصي وش رايكم في الموضوع يا جماعة ؟
على العموم الفترة الجاية الى اجازة العيد راح يقل دخولي للنت بشكل كبير بسبب الاختبارات المتلاحقة نشوفكم على خير وادعولنا
اليوم بقولكم نصيحة عمركم خاصة للي حلمهم يكونون كتاب وراعين كتب وروايات والناس تتضارب عشان كتبها
النصيحة بكل اختصار اكتب في المحرمات الاجتماعية <<وش رايكم بالمصطلح خطير صح؟
اللي اقصده اكتب في اي شي تحس انه محرم اجتماعيا مثلا ناخذ رواية بنات الرياض مع اني شخصيا اشوف ان كلمة رواية بدري عليها بقوة لا الكتاب ولا الكاتبة المهم اللي قرا الرواية ممكن لما خلص منها تحسف على الوقت اللي قضاه في قرايتها ليه لان البنت تكلمت عن احد المحرمات الاجتماعية الا وهو علاقة الولد بالبنت خارج اي علاقة طبيعية مثل زواج او قربى او غيره هالشي خلى الرواية تطلع فوق وتحتل المركز الاول لاكثر الكتب مبيعا على مكتبة النيل والفرات الالكترونية لفترة طويلة لكن الانسان العاقل واللي بيفكر في الموضوع راح يحصل ان اللي رفعوا هالرواية او مثلها من الروايات هم اصحاب العقول المتحجرة والناس االلي مقتنعة ان المجتمع السعودي مجمتع ملائكي وافراده لا يخطئون خصوصا في امور الشرف لكن هالشي غير صحيح ابدا اذا الشخص يشوف اللي قدامه في البيت بهالصورة ممكن لعدة اسباب اول شي ان مجتمعنا ما وصل لدرجة المجاهرة بالاشياء والعلاقات بين افراد العائلة الواحدة مثلا قليل جدا اللي تلقاه يقول لامه والا ابوه ان صديقتي قالت لي كذا والا كذا او حتى احد من اخوانه وممكن ان من عندك بالبيت من راعين هالعلاقات المشبوهه لكن انت ما تدري عنها ويظهرون قدامك بمظهر برئ .
الزبدة اللي يبي يكتب رواية وتنجح بشكل كبير وهو موجهها للمجتمع السعودي يكتب في احد هالامور
الجنس خارج نطلق الزوجية او داخلها بطريقة غير متوقعة ومقززة
المخدرات والعلاقات بين الجنسين والدين بس لا تخربونها مرة يعني انا قبل امس جاني ايميل يتكلم ان فيع مجموعة سعودية مسوين جميعة تنصيرية داخل المملكة فممكن يجي واحد يتخيل ان دخل وسط هالتنظيم وانهم حاولوا ينصرونه طبعا وهو شيخ وما يخطي عشان كذا ما تنصر ويقعد يخربط علينا ويتخيل امور مالها وجود وانا اضمن له منع الرواية في السوق وبيعها مهربه وارباح كبيرة بس لا ينساني من الارباح
هذا شي كان يدور في خاطري من كم يوم لما قريت رواية بنات الرياض اللي اشوف انها اخذت اكبر من حجمها بكثييييييير لانها اتخذت الطريق اللي تكلمت عنه فوق وحبيت اني اشارككم وجهة نظري واشوف رايكم في الموضوع
اليوم رحت للجامعة العشا على ان فيه محاظرة اليوم لكن اللي صار ان المعيد جا مكان الدكتور واخذ الحظور ورطلعنا ولما طلعنا شفت جدول الاختبارات النهائية معلق في الكلية المهم جتني صدمة من جدولي اللي وبكل جدارة هو اسوأ جدول لي من دخولي للجامعة
اللي صاير يا جماعة ان الاسبوع الجاي عندي يوم الاثنين اختبار Unit Process شهري
ويوم الاربعاء عندي اختبار رياضايات شهري برضو
ويوم الاحد اللي بعده اختبار كيمياء عضوية شهري
والثلاثاء اختبار موازنات بالكمبيوتر شهري
وباقي اختبار كيمياء فيزيائية شهري ما تحدد موعده بسبب ان الكتور حبيب مرة ويحبنا الله لا يوفقه وياخذ عمره ويفكنا من اشكاله من الحاقدين
والثلاثاء اختبار كيمياء عضوية نهائي
وبعدها نعطل للعيد وهذي هي المشكلة في هالعطلة
ويوم السبت بعد العيد عندي اختبار Thermodynamic الصباح
ويوم الاثنين اختبار موازنات بالكمبيوتر الصباح وكيمياء فيزيائية الظهر
ويوم الاربعاء اختبار Unit Process الصباح واختبار رياضيات الظهر
وش رايكم يا جماعة مو ضغط
انا من بكرة بحاول اني اقدم اختبارات او أأجل اختبارات لو يوم واحد راح يكون افضل من اختبارين في اليوم خصوصا ان اغلب المواد اللي ممكن اعدلها مالها الا شعبتين ومواد تخصص يعني منا وفينا وان شاء الله ما تطلع مشاكل واعتراضات
ادعولي