::AbOd::

تعب تعب تعب كل المواعيد تعب

الحمد لله قمت بدري وشلت عفشي وعلى محطة القطار واخذت تذكرة لميونخ وكنت موجود قبل موعد القطار بحوالي نص ساعة يوم ركبنا حاولت انام لكن ما فيه امل والعربة مليانة بزران وانواع الصياح والعائلة اللي جنبي ما خلوا شي ما سووه وهم جالسين ياكلون ويلعبون ويغنون ويغيرون حفايظ الله كريم بس وبعد رحلة متعبة بصراحة

وصلنا وتوجهت للفندق اللي معي عنوانه اللي قلت لكم عليه امس اول ما دخلته بصراحة صدمت منه مو نفس الوصف اللي في الموقع طبعا وانا عند الاستقبال قالت لي الموظفة ما فيه حجز باسمك يمكن ما وصل من الموقع وقالت مو مشكلة فيه غرف فاضية وحجزت لي وحدة ودخلت ريحت لي نص ساعة وطلعت اكل لاني جدا جوعان طبعا وانا اكل وراسي مصدع وحالتي حالة بدت الهاوجس كيف ما وصل حجزي اخر شي قررت ارجع اتاكد من عنوان الفندق وتاكدت بعد ما دفعت ١٧ يورو للانترنت ليوم كامل ويوم سالت قالوا فيه ثلاث فنادق بنفس الاسم في ميونخ وطلع اللي دخلته مو اللي انا حاجز فيه والدبرة وشي من هنا من هنا تقرر اني اروح للي حاجز فيه وانتظز مدير الفندق الثاني يداوم الصبح ونشوف وش يقرر طال عمره
بصراحة فلم هندي اتحدى اقوى المخرجين يسويه

اما بالنسبة لاشتراك النت الفندق اللي انا حاجز فيه من الاساس طال عمرهم مزود الخدمة يختلف عن فرعهم الثاني يعني ممكن ال١٧ يورو اللي دفعتها تكون قيمة خمس دقايق شيكت فيها ايميل الحجز

كل هذا كتبته اوف لاين على امل اني بكرة لما اطلع احصل مكان فيه هوتسبوت للشركة اللي دفعت لهم حق يوم وانزل هالكلام كله الى اللقاء في الغد ان شاء الله