وصلنا اليوم الرابع

اليوم بعد الفطور رحت في مهمة سريعة لمحل كان مسكر يوم مريته في اليوم اللي قبل اخذت منه شوكولاته
ورجعت للفندق وطلبت تاكسي وعلى محطة القطار واخذت تذكرة لفيينا على السريع
وتخيل اول مرة تركب قطار في حياتك كل شي بالالماني وانا ثقافتي فرنسية

المهم ربكم ستر بغيت انزل اول محطة وقف فيها القطار بس اكتشفت اني القطار اللي انا فيه بيوقف في ثلاث محطات قبل فيينا مو مباشر
الرحلة اخذت قريبا ساعتين ونص

ومن محطة قطار فيينا الى الانرقراوند دايركت والحمد لله لاول مرة يتم شي بدون مشاكل الين وصلت لاقرب محطة للفندق
وبعدها لفيت ولفيت ولفيت ولا لقيت الفندق فرجعت للمحطة وسالت مكتب المعلومات وقام مشكورا بطباعة كروكي يوصل للفندق والحمد لله تمت الامور بخير

لتصل الصدمة الكبرى الفندق طلع ما هنا ذاك الزود
الفندق قديم واثاثه سياحي يذكرني بفنادق جدة اللي من ميتين سنة

المهم اخذتها من قاصرها ولا دورت فندق ثاني لاني واثق اني بتعب على الفاضي بكرة نهائي اوروبا وكلش فل

بعد كذا ريحت لي حول ساعتين وبعدها طلعت اتعشى ورحت امشي على الدانوب (النهر مهوب السوبرماركت ) وطولت هناك شوي كنه اعجبني الجو
عاد وانا راجع للفندق عقلي الباطن قال ما اخليك ترجع بسرعة فدخلت من الشارع اللي قبل الشارع اللي ابيه وما انتبهت لهالشي الين رجعت ولقيت الطريق الصح

هذا ملخص اليوم

احداث جانبية:
صرت اتابع السي ان ان والبي بي سي كثير
شاحن واحد من الجوالات انقطع
بكرة بشوف اذا لقيت شاحن رخيص اخذته الايكفي جهاز واحد

الى الغد ان شاء الله