اليوم الثالث في اوروبا
كان هاليوم غيير من جد طبعا كنت متوقع انه بيكون اكثر راحة من اليومين اللي قبل بس طلع العكس

الشي اللي قاهرني هو اني ماخذ خريطة من الفندق وعليها اعلان ما استفدت منه الا اليوم المهم اللي صار انه امس بالليل وانا داخل الفندق سالت عن جولات سياحية تسويها شركة وعن الوقت اللي تاخذه لانه فيه جولتين سبق قريت عنهم وودي اروح لها المهم اتصلت الموظفة عن الشركة وسالتهم عن امكانيه اني اخذ جولتين متتالية هل الجدول والوقت يسمحون قالوا عادي ما عندنا مشكلة فحجزت جولتين يبدون الساعة ٩ الصباح

المهم اني من الذهانة حطيت المنبه حق الجوال وحق الفندق قبل الموعد اللي ابي اقوم فيه بساعة وقمت واكتشفت الموضوع ورحعت نمت شوي وقمت مرة ثانية
وعلى ما جهزت ونزلت قلت باقي ٥ دقايق على الموعد اللي بتجي السيارة تاخذني فيه يمديني افطر ع السريع
اول ما نزلت لقيت السيارة موقفة قدام الفندق فكنسلت الفطور على طول وطلعت للسواق وقلتله تحتريني يالحبيب قال ايه وشاف التذاكر وقال اوكي فيه اربعة غيرك بيجون معنا من نفس الفندق قلت هذي الساعة المباركة خل اروح اتقهوى الين يجون

فافطرت سلطة فواكه وبعدها قهوة ع السريع ونزلوا الجماعة ومشينا لنقطة التجمع ومنها الى منجم الملح وجهتنا الاساسية الاولى مرورا بسلسلة جبال بفاريا (واحلى تحية لابو فادي:)) وبعدها المنجم ونزلنا تحت الارض بحوالي اربع ادوار وشفنا كيف الوضع واخذ الموضوع حوالي الساعة ونص وبعدها عطونا عينات من الملح وصرفونا

طبعا حنا متاخرين شوي لاننا ما مشيا على الموعد وزاد البلة شلة عجز وشايب تاخروا ما طلعوا من المنجم

وبعدها في نص طريق الرجعة وقف الباص ونزلني انا والشلة المتأخرة عشان نروح لوجهتنا الثانية لاني الباص الثاني كان ينتظرنا في الطريق وكانت الوجهة لاكبر كهف ثلجي في العالم وهو قمة جبال الالب النمساوية

طبعا هالكهف سالفته سالفة ومتعب وممتع بنفس الوقت تقدر تشوف عظمة الخالق
وجو بارد وش زينة وهنود علة (شلة الاربعاء ذكروني اقولكم السالفة لانها ما تصلح للنشر )

ورجعت للفندق بعد كذا عشان اريح واطلع اتعشى لكن للاسف اني مريت سوبرماركت وانا راجع واخذت شيبس واكلته ومالي نفس اكل شي الحين وفتحت اللاب توب واخذني الوقت فشكلي بقوم ارتب اغراضي وانام غدا موعدنا من فيينا ان شاء الله